gan
Cered Menter Iaith Ceredigion
Diolch i Stuart Ladd a’r Tivyside am gael defnyddio’r lluniau
Diolch i Stuart Ladd a’r Tivyside am y llun
Yng nghanol holl ddathliadau Diwrnod Owain Glyndŵr yn Ffair Elen, Llandysul ar Ddydd Sadwrn Medi 16eg fe berfformiodd Theatr Fach Llandysul am y tro cyntaf un.
Clwb drama ar gyfer plant ifanc 7-11 oed yw Theatr Fach Llandysul ac maent yn cwrdd bob prynhawn Gwener ar ôl ysgol yn Y Ffynnon. Yn cael ei redeg gan Cered: Menter Iaith Ceredigion a Plethu sef mudiad cymunedol i hybu’r celfyddydau trwy gyfrwng y Gymraeg yn Llandysul, prif nod y clwb yw i greu cyfle i blant yr ardal ddefnyddio eu Cymraeg tu allan i’r ysgol.
Bywyd cynnar Elen sef mam Owain Glyndŵr oedd testun perfformiad y plant. Uchafbwynt y perfformiad oedd cân am Elen a gyfansoddwyd yn arbennig ar gyfer yr achlysur gan y gantores a’r gyfansoddwraig, Lleuwen Steffan. Ysgrifennwyd y gân hon yn dilyn sesiwn syniadau rhyngddi hi â phlant y clwb.
Dywedodd Siriol Teifi, swyddog datblygu Cered: Menter Iaith Ceredigion ac un o arweinyddion Theatr Fach Llandysul, ei brwdfrydedd: “Daeth ein hactorion ifanc a dawnus â stori Elen yn fyw mewn modd cyfareddol.”
Mae llwyddiant perfformiad cyntaf Theatr Fach Llandysul yn tanlinellu pŵer parhaus adrodd straeon drwy’r celfyddydau, gan gysylltu gorffennol, presennol a dyfodol Llandysul.